བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གསུམ་པ་མན་ངག་གི་
རྒྱུད་ཅེས་བྱ་བ་བཞུགས་སོ། །
The Third Part Called The Oral Instuction Tanta From
The Secret Quintessential Instructions
On The Eight Branches Of The Ambrosia
Essence Tantra.
.
ལེའུ་དང་པོ། མན་ངག་་རྒྱུད་ཞུས་པ།
༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་དེས་ཏིང་ངེ་འཛིན་དེ་ལས་བཞེངས་ཏེ། དགོས་འདོད་འབྱུང་བ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་སྐུའི་ལྟེ་བ་ལས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་ཕོངས་པའི་སྡུག་བསྔལ་བསལ། ཕྱི་ནང་གི་ནད་ཐམས་ཅད་ཞི་བར་བྱས་ཏེ་སླར་སྐུའི་ལྟེ་བར་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་ཡོན་ཏན་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས།
གསུང་གི་སྤྲུལ་པ་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ། ། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །རྒྱས་པར་བཤད་རྒྱུད་དེ་ལྟར་གསུངས་ལགས་ན། །མན་ངག་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌།
ཡོན་ཏན་ལས་སྤྲུལ་པའི་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། ཀྱེ་དྲང་སྲོང་ཆེན་པོ་ཡིད་ལས་སྐྱེས། གསུམ་པ་མན་ངག་རྒྱུད་ལ་བསླབ་པ་ནི། །འགྲོ་མཆོག་གཙོ་བོར་གྱུར་པའི་མི་ལུས་ཀྱང༌། །མ་རིག་འཁྲུལ་པའི་དབང་གིས་འཁོར་བར་འཁྱམ། །གཏི་མུག་དབང་གིས་སྐྱོན་ཡོན་རྒྱུ་མ་ཤེས། །འདོད་པའི་དབང་གིས་སྡིག་པའི་ལས་མང་སྤྱད། །ཞེ་སྡང་དབང་གིས་གཞན་ལ་གནད་དུ་བཙུགས། །ཕྲག་དོག་དབང་གིས་མཐོ་ལ་འགྲན་སེམས་བསྐྱེད། །ང་རྒྱལ་དབང་གིས་དམའ་ལ་ཁྱད་དུ་བསད། །རིག་པ་སྤྱང་པས་རྩོམ་པ་ཀུན་ལ་འཇུག །མདོ་དོན་ཆུང་བས་ཡུན་གྱི་སྲིད་མ་རྙེད། །ལས་ངན་བག་ཆགས་རྒྱུན་འཁྲིགས་བསགས་པ་ཡིས། །འཁོར་བའི་ཁ་བརྒྱུད་ལུས་ངན་སྣ་ཚོགས་བླངས། །དེ་ཕྱིར་ལས་དང་ཉེས་པ་ལས་བྱུང་བའི། །བཞི་བརྒྱ་རྩ་བཞིའི་ནད་དུ་གྲགས་པ་ཡིས། །བདེ་བའི་བར་སྐབས་མེད་པར་ལུས་སེམས་གདུངས། །
དེ་ལ་ཉེས་པ་ཁོང་ནད་ཚད་པ་དང༌། །ལུས་སྟོད་དོན་སྣོད་གསང་བ་ཐོར་བུའི་ནད། །ལྷན་སྐྱེས་རྨ་བརྒྱད་ལུས་སྤྱིར་གསོ་བ་སྟོན། །
བྱིས་པ་མོ་ནད་གདོན་མཚོན་དུག་ནད་དང༌། །རྒས་པ་རོ་ཙ་ཡན་ལག་བརྒྱད་པོ་ཡིས། །སྤྱི་བོའི་གཙུག་ནས་རྐང་མཐིལ་ཡན་ཆད་ཀྱི། །ནད་ཀྱི་རིགས་སུ་གྱུར་པའི་བཅོས་ཐབས་ཀུན། །ལག་ལེན་མན་ངག་རྒྱུད་ཆེན་འདི་ནང་དུ། །བརྩེ་བའི་སེམས་ཀྱིས་དྲང་སྲོང་ཁྱོད་ལ་བཤད། །གུས་པས་ཉོན་ལ་ཡིད་ལ་ཟིན་པར་གྱིས། །དྲེགས་མེད་བྱམས་པའི་སེམས་ཀྱིས་ནད་པ་གསོས། །
ཀྱེ་དྲང་སྲོང་ཆེན་པོ་ཡིད་ལས་སྐྱེས། །བློ་རབ་དོན་དུ་རྩ་རྒྱུད་མདོར་བསྟན་བཤད། །བློ་འབྲིང་དོན་དུ་བཤད་རྒྱུད་རྒྱས་པར་བཤད། །ཐ་མའི་དོན་དུ་ཤིན་ཏུ་རྒྱས་པ་ཡི། །དམར་ཁྲིད་ལག་ལེན་གཅིག་ཏུ་ཁྲིགས་བསྡེབས་པའི། །མན་ངག་རྒྱུད་འདི་བཅོ་ལྔའི་སྐབས་ཀྱིས་དབྱེ། །དེ་ལ་རླུང་མཁྲིས་བད་ཀན་སྣ་དྲངས་ནས། །ནད་རིགས་གང་ལ་གསོ་ཐབས་གང་དགོས་པ། །ཁྱོད་ཀྱིས་དྲིས་ཤིག་ང་ཡིས་བཤད་ལུང་སྦྱིན། །ཞེས་གསུངས་པ་དང༌།
དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །དྲང་སྲོང་ཆེན་པོ་རིག་པའི་ཡེ་ཤེས་ལགས། །ཁྱོད་ནི་འགྲོ་ཀུན་དཔལ་དུ་ཤར་བས་ན། །དང་པོར་མདོ་གནས་རྩ་རྒྱུད་བསྡུས་པར་གསུངས། །དེས་མ་ཁྲོལ་ལ་བཤད་རྒྱུད་རྒྱས་པར་གསུངས། །ད་ནི་དེ་ཡི་ལག་ལེན་མན་ངག་རྒྱུད། །སྐབས་ཀྱི་དབྱེ་བ་བཅོ་ལྔར་གསུངས་པ་ལས། །ཉེས་གསུམ་གསོ་བའི་སྐབས་ལ་ཇི་ལྟར་བསླབ། །རླུང་དང་མཁྲིས་པ་བད་ཀན་རྣམ་གསུམ་གྱི། །རྒྱུ་རྐྱེན་དབྱེ་བ་རྟགས་དང་བཅོས་ཐབས་རྣམས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཀྱེ་ཧོ་འགྲོ་བའི་དོན་དུ་བཤད་དུ་གསོལ། །གྲོགས་ཀྱི་དམ་པར་དགོངས་ལ་བཤད་དུ་གསོལ། ཅེས་ཞུས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མན་ངག་རྒྱུད་ཞུས་པའི་ལེའུ་སྟེ་དང་པོའོ།། །།
