ལེའུ་ཞེ་གསུམ་པ། མོ་མཚན་གྱི་ནད་གསོ་བ།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག མོ་མཚན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།
རྒྱུ་རྐྱེན་ཉལ་པོ་མང་དུ་སྤྱད་པ་དང༌། །ཁྲག་འཛག་བུ་བཙས་རྗེས་ལ་ཟས་སྤྱོད་ལོག །དེ་ཡིས་མངལ་ནད་མ་ལུས་སྐྱེད་པར་བྱེད།།
དབྱེ་བ་རླུང་མཁྲིས་ཁྲག་དང་བད་ཀན་འདུས།
།
དེ་རྟགས་རླུང་གྱུར་མངལ་ནང་ཚོར་མེད་བེམ། །ཟླ་མཚན་སླ་ཞིང་ལྦུ་བཅས་ཉུང་དུ་འཛག །ཆུ་ཁ་སྙི་ཞིང་སེམས་ཅན་ཡོད་སྙམ་སེམས། །ཟླ་མཚན་རླུགས་སམ་འཁྱིལ་དང་སྐྲན་དུ་འདྲིལ། །ཁ་འཆུས་་ཁུ་བ་རློན་ཟུམ་ཧར་པོ་སོགས། ། མངལ་ནད་མི་བཟད་དུ་མ་འབྱུང་བར་བྱེད། །
མཁྲིས་གྱུར་ཟླ་མཚན་སེར་ནག་དྲི་མ་ཆེ། །ཚ་འབྲབ་ཚ་བ་སྐྱེ་ཞིང་རྣག་ཏུ་འཛག ། ཁྲག་གྱུར་ཟླ་མཚན་མི་ཆད་རྟག་ཏུ་འཛག ། བད་ཀན་གཡའ་གྲང་ཟུག་ཆུང་སྤྱིན་བག་འཛག ། འདུས་པ་ལས་གྱུར་ནད་ཀུན་བྱེད་པར་བཤད། །དེ་ལྟར་མངལ་ནད་ཀུན་གྱིས་བུ་མི་འཛིན། །
བཅོས་ཐབས་མངལ་ནད་ ཕལ་ཆེར་རླུང་ཡིན་པས། ། སྣུམ་འཆོས་འཇམ་རྩི་དུགས་ཀྱིས་གསོ་བར་བསྔགས། ། དེ་འོག་འཆུས་པ་ལག་བསྲང་ཞིང་ཁ་ཟུམ་སྦྱང༌། །རྩ་སྦུབས་འཇམ་པོས་མངལ་ནད་ཀུན་སྦྱངས་ཏེ། །གོ་སྙོད་ཤུ་དག་རྒྱམ་ཚྭ་པི་པི་ལིང༌། །ཟི་ར་ནས་སྔོན་ཚིག་ཐལ་བ་ཤ་ཀ །ལ་ལ་ཕུད་དང་ཙི་ཏྲ་ཀ་རྣམས་ནི། ། ཆང་དང་མར་བཙོས་མངལ་ནད་གཞང་འབྲུམ་སེལ། ། ར་ཎ་་གཟེ་མ་བ་ཤ་ཀ་བསྐོལ་བླུད། ། རྒྱ་སྤོས་རྒྱ་སྤོས་ཀཎྜ་ཀ་རི་རུ་རྟ་དང༌། ། རྒྱམ་ཚྭ་ཐང་ཤིང་ཁུ་བ་མར་དུ་བསྐོལ། ཡེ་འུ་ལ་བྱུགས་མངལ་ནང་གཞུག་པར་བྱ། །
མཁྲིས་གྱུར་སེང་ཕྲོམ་རུ་རྟ་བ་ཤ་ཀ
། ཁུ་བ་ཡེ་འུ་ལ་བྱུགས་མངལ་དུ་བཏང༌། །ཉེ་ཤིང་ཁུ་བ་འོ་མ་མར་བསྐོལ་ཁུར། ། ར་མཉེ་ཉེ་ཤིང་ཤིང་མངར་རྒུན་འབྲུམ་དང༌། །བ་ལེ་པི་པི་ལིང་དང་ཀ་ར་སྦྲང༌། ། མངལ་ཁྲག་ཁུ་བའི་ནད་སེལ་བུ་སྐྱེད་མཆོག །
གཟེ་མ་ཉེ་ཤིང་འོ་མ་སྦྱར་བའམ། །ཤིང་མངར་སྦྲང་རྩི་སྐྱེར་པ་པྲི་ཡངྐུ། །འབྲས་བཀྲུས་ཆུར་སྦྱར་མངལ་ཁྲག་འཛག་པ་གཅོད། །
བད་གྱུར་བུ་རམ་ཆང་དང་ཨ་རུའི་ཆང༌། ། པི་པི་ལིང་དང་ཨ་རུ་ལྕགས་ཕྱེ་སྦྲང༌། །ནག་ཚུར་རྒྱམ་ཚྭ་ཨ་བྱག་འབྲས་བུ་གསུམ། །སྦྲང་དང་སྦྱར་བས་བད་ཀན་མངལ་ནད་སེལ། །
ཚ་བ་ལྔ་དང་བ་གཅིན་སྦྱར་བ་བཏང་། ། མཁྲིས་ལ་ཤིང་མངར་འོ་མར་བཅས་པ་དང༌། །རླུང་ལ་སེ་འབྲུ་ཞུན་མར་སྦྱར་བ་བཏང༌། ། ལྡན་པ་གཉིས་འབྲེལ་འདུས་པ་ཀུན་གྱིས་གསོ། །
ཀུན་ལ་རུ་རྟ་སྔོ་རྒྱ་སྤོས་འབྲས་བུ་གསུམ། ། ཤུ་དག་ཤིང་ཀུན་ར་མཉེ་ཧོང་ལེན་བཙོད། །ཤིང་མངར་ཉེ་ཤིང་ཡུང་སྐྱེར་ལ་ལ་ཕུད །སྨན་མར་མངལ་ནད་ཁུ་བའི་ནད་ཀུན་སེལ། ། གདོན་འཇོམས་མངལ་ཆགས་དུས་ཟོས་བུ་འཆི་གསོས། །ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མོ་མཚན་གྱི་ནད་གསོ་བའི་ལེའུ་སྟེ་བཞི་བཅུ་རྩ་གསུམ་པའོ། །དེ་ལྟར་ལེའུ་གཉིས་ནི་གསང་ནད་གསོ་བ་སྟེ་སྐབས་དྲུག་པའོ།། །།
No comments:
Post a Comment