ལེའུ་ཞེ་གཉིས་པ། ཕོ་མཚན་གྱི་ནད་གསོ་བ།
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །གསང་ནད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ།
ཞེས་ཞུས་པ་དང༌།
དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།།
ཀྱེ་དྲང་སྲོང་ཆེན་པོ་ཉོན་ཅིག གསང་བའི་ནད་ལ་ཕོ་མཚན་མོ་མཚན་གཉིས། །ཕོ་མཚན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།
རྒྱུ་ནི་ཆགས་པ་སྤྱད་དྲགས་གྲ་མས་རེག ། བཤང་གཅི་ཁུ་བའི་ཤུགས་བཀག་བཙིར་ལས་འབྱུང༌།།
དབྱེ་བ་སོས་ཟིན་འབྲུམ་པ་མདུད་འདྲ་དང༌། །སྦུབས་འབྱར་གྲ་མ་ཅན་དང་རྣམ་པ་ལྔ། ། སོས་ཟིན་ལ་རླུང་མཁྲིས་ཁྲག་དང་བད་ཀན་འདུས།། །ཕོ་མཚན་ལ་ནད་རིགས་རྣམ་པ་དགུ་རུ་བཤད།།
དེ་རྟགས་སོས་ཟིན་རླུང་ལས་གྱུར་པ་ནི། །རྟག་ཏུ་འགྲེང་དང་པགས་པ་འགས་པར་བྱེད། ། མཁྲིས་གྱུར་དམར་པོར་སྐྲངས་ལ་ཚ་བ་སྐྱེ། ། ཁྲག་གྱུར་འབྲུམ་པ་ནག་པོ་ཁྲག་བཅས་འཛག ། བད་ཀན་གཡའ་ཞིང་སྐྲངས་ལ་ལྕི་བ་ཡིན། ། འདུས་གྱུར་རླིག་སྐྲངས་རྣག་དཀའ་ཀུན་རྟགས་ལྡན། །
འབྲུམ་པ་ཅན་ནི་འབྲུམ་པ་མང་པོས་ཁྱབ། ། མདུད་འདྲ་པགས་པ་ཕྱིར་ལོག་སྐྲངས་ཤུ་འབྱུང༌། ། སྦུབས་འབྱར་ཁ་ཟུམ་གཅིན་འབྱུང་འཆུ་ཞིང་འགག ། གྲ་མ་ཅན་ནི་གྲ་མས་གང་སེམས་ན།།
གསོ་ཐབས་སོས་ཟིན་གསར་དུས་གཏར་ག་གདབ། ། ནི་རུ་ཧས་དྲང་བསིལ་བའི་བྱུག་པ་བྱ། ། སྨིན་ནས་བརྟོལ་ལ་མར་སྦྲང་ཏིལ་བསྐོལ་བྱུག །སྤང་མ་སེང་ཕྲོམ་ལྡོང་རོས་བཙག་ཡུག་རྣམས། ། བ་བླ་ནག་མཚུར་སུག་སྨེལ་སྐྱེར་ཁཎྜ། ། རྒྱ་ཚྭ་རྒྱམ་ཚྭ་ཧ་རེ་ཎུ་ཀའི་ཕྱེ།
། སྦྲང་སྦྱར་བྱུག་པས་སོས་ཟིན་རྨ་འཚོ་བྱེད། ། རྫ་གསར་འབྲས་གསུམ བསྲེགས་ཐལ་མར་སྦྱར་བྱུག ། རླུང་གྱུར་སེང་ཕྲོམ་མར་དང་སྦྱར་ལ་བྱུག ། མཁྲིས་གྱུར་ག་བུར་ཙན་དན་དཀར་པོ་ལྡེ་གུ་བྱུག ། ཁྲག་གྱུར་རུ་རྟ་བ་ཤ་ཀ་ཡིས་བྱུག ། བད་ཀན་ལས་གྱུར་སྐྱུ་རུ་སྦྲང་རྩི་བྱུག ། འདུས་པ་ཡིན་ན་རྨ་སྤྱིའི་གསོ་བ་སྦྱར། །
འབྲུམ་པ་བཞར་ལ་སོས་ཟིན་ལྟ་བུར་བཅོས། ། མདུད་འདྲ་སྣུམ་བྱུག་མྱེ་ཞིང་སྣུམ་པས་བདུག
། སྦུབ་འབྱར་སྦུ་གུས་བརྒྱང་ཞིང་དྲལ་ལ་གསོ། ། གྲ་མ་ནས་ཕྱེ་གོ་སྙོད་མར་བཙོས་དཀྲི། །ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕོ་མཚན་གྱི་ནད་གསོ་བའི་ལེའུ་སྟེ་བཞི་བཅུ་རྩ་གཉིས་པའོ།། །།
No comments:
Post a Comment