ལེའུ་སོ་བདུན་པ། མཚེར་པའི་ནད་བཅོས་པ།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །མཆེར་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་རུ་བཤད།།
རྒྱུ་ནི་མ་ཞུ་རླན་གྲང་དྲག་ཤུལ་སྐྱེད། ། དབྱེ་བ་མཆེར་ནད་ཚ་བ་ཁྲག་སྦོས་དང༌། །མཆེར་རླུང་མཆེར་པའི་བད་ཀན་རླུགས་པ་ལྔ།། །
མཆེར་ནད་ཚ་བ་ཆང་འཐུངས་དྲོས་ཚེ་སྦོ། ། ལྕེ་ཁྲ་དབུགས་རྒོད་མཆུ་དང་གདོང་པ་སྨུག ། རྐང་ལག་སྦྲིད་ཅིང་གཡོན་གྱི་རྩིབ་ཐུང་གཟེར། །ཁྲག་སྦོས་དེ་འདྲ་བཞིན་མདོག་སྔོའམ་སེར། ། །ཁོང་ལྕི་སྦོ་འཁྲོག་བྱེད་ཅིང་མ་མཆུ་འཕྱང༌། །མཆེར་རླུང་ལུས་སྐྲངས་སྦོ་འཁྲོག་འཇུ་སྟོབས་ཆུང༌། ། སྒྲེག་པའམ་འོག་རླུང་ཐོན་ན་བདེ་སྙམ་བྱེད། །མཆེར་པའི་བད་ཀན་མཆུ་ལ་བད་ཀན་ཆགས། ། གྲང་དང་དགོང་དུས་སྦོ་ལ་གཡོན་ངོས་གཟེར། ། རླུགས་པ་སྦོ་འཁྲོག་ཕྱི་ས་་མི་ཐུབ་འཆོར།།
།
བཅོས་ཐབས་མཆེར་ཚད་ལི་ཤི་ཀ་ཀོ་ལ། ། སུག་སྨེལ་གུར་ཀུམ་ཏིག་ཏ་གསེར་མེ་ཏོག །སླེ་ཏྲེས་ཀ་ར་སྦྱར་བའི་ཕྱེ་མ་བཏང༌། །ཀ་ཀོ་ལ་དང་གུར་ཀུམ་ཨ་རུ་ར། །ཀ་ར་སྦྱར་བཏང་མཆེར་པའི་རྩ་ལ་གཏར། ། ཁྲག་སྦོས་ནད་ལ་མ་ནུ་པི་པི་ལིང༌། ། སུག་སྨེལ་ཤུ་དག་དོང་གྲ་ན་ལེ་ཤམ། ། ཁ་རུ་ཚྭ་དང་ཤིང་ཚ་རྒྱམ་ཚྭ་དང༌། །བུ་རམ་སྦྱར་བཏང་ངར་གདོང་མཆེར་རྩ་གཏར། །
མཆེར་པའི་རླུང་དང་བད་ཀན་གཉིས་ཀ་ལ། ། ཤིང་ཀུན་ཁ་རུ་ཚྭ་ཡི་བསྡུས་ཁུ་བཏང༌། ། ད་ལིས་སུག་སྨེལ་ཤིང་ཚ་ཁ་རུ་ཚྭ། ། ཟི་ར་ཚ་བ་གསུམ་དང་བུ་རམ་སྦྱར། ། མཆེར་པའི་སྟེང་དང་བཅུ་གཅིག་ཁ་གསུམ་བསྲེག ། རླུགས་པའི་ནད་ལ་ཨ་ཤོ་གནྡྷ་དང༌། །རྒྱམ་ཚྭ་ཁ་རུ་ཚྭ་ཡི་ཕྱེ་མ་བཏང༌། །བསྲེག་པ་གོང་བཞིན་མཛོ་དང་རྟོལ་ཤ་བྱིན། ། དབང་པོ་ལག་པ་གེ་སར་རྣམ་པ་གསུམ། ། བུ་རམ་སྦྱར་བས་མཆེར་པའི་ནད་ཀུན་སེལ། །ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཆེར་ནད་གསོ་བའི་ལེའུ་སྟེ་སོ་བདུན་པའོ།། །།
No comments:
Post a Comment