ལེའུ་སོ་དྲུག་པ། མཆིན་ནད་གསོ་བ།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག བཙུན་མོ་ལྟ་བུ་མཆིན་པའི་གསོ་ཐབས་ལ། ། རྒྱུ་དང་དབྱེ་བ་རྟགས་དང་བཅོས་ཐབས་བཞི།།
རྒྱུ་ནི་རོ་ཚ་སྐྱུར་ཟས་དང་དྲག་ཤུལ་གྱིས་སྐྱེད།།
དབྱེ་བ་ལེབ་རྒན་རྒྱས་དང་ལྡེམ་བུ་དང༌། །དུག་ཐབས་ཆུ་ཤོར་རྐུན་བུ་འོར་ལྷུང་དང༌། ། ལུད་གཞུང་རེངས་མཆིན་གྲུམ་ནག་པོ་དང༌། །མཆིན་ནད་ཧལ་སྐེམ་མཆིན་དྲི་དཀར་ནག་དང༌། །གནད་མཆིན་རྩ་བྱེར། གྲང་་མཆིན་རླུང་མཆིན་རྒུད་དང༌། །རླན་གྲང་གླང་དགུར་གྲང་སྦོས་བཅོ་བརྒྱད་དོ།།
དེ་རྟགས་མཆིན་ནད་ལེབ་རྒན་རྒྱས་པ་དེ། །མཆིན་སྟེང་རྩིབ་ཐུང་གཡས་གཡོན་སྦོ་ཞིང་ན། །ལུས་དང་མཚོགས་མ་ལྕི་ཞིང་རོ་སྟོད་གཟེར། །སྟེང་བཏོན་རྡིབ་སྙམ་འོག་བཅུག་འབུགས་སྙམ་བྱེད། །ཙོག་པུར་འདུག་ན་ཐུར་ལ་འཐེན་པ་འདྲ། །ཤ་སེར་མཁལ་རྐེད་མི་བདེ་སྒྱིད་པ་འཁུམས། །
མཆིན་ནད་ལྡེམ་བུ་ན་བ་མི་ཚོར་བར། ། གཉིད་མེད་ཁོང་སྙོམ་ལུས་ལྕི་ཟས་མི་འདོད། ། ཁྲག་འབྲོས་ཤ་དང་རུས་པ་ཁད་ཀྱིས་སྐམ། །
དུག་ཐབས་མིག་དམར་གདོང་སྔོ་རྩིབ་སྟེང་ཟུག ། ཕོ་མཆིན་གང་སྙམ་འཇུ་དཀའ་ཟོས་ཚེ་ན། །བྲུན་སྐམ་བོལ་གཡོ་མུར་གོང་མཐིལ་བཞི་སེར། །གཞུག་ཏུ་མཆིན་པ་རུལ་ནས་དུད་ཁུར་ལུ། །
ཆུ་ཤོར་ཁོང་སྦོ་རོ་སྟོད་བརྫིས་ན་ཕན། ། སྒལ་རེངས་མཆིན་པ་འཕྱོངས་ཤིང་གཡལ་མི་ཐོན། །ཕོ་མཆིན་སྟོང་སྙམ་དྲོས་དྲགས་མགོ་བོ་ན། །
རྐུན་བུ་རྐང་པ་གྲང་ལ་རོ་སྟོད་གཟེར། ། མིག་གིས་ཡས་ལྕིབས་མི་ཐེག་ཉམ་ཆུང་སྙ། །སྟོད་གང་དཔུང་མགོ་གཟེར་ལ་སྐེ་རྩ་རེངས། །ཁ་ཟས་ཟོས་ན་བག་རེ་ཕན་སྙམ་བྱེད། །
འོར་ལྷུང་གཉིས་ལས་མཆིན་ཁྲག་རྐེད་པར་ལྷུང༌། ། རྐེད་པ་འཁོར་ཞིང་འགུལ་ན་ཟུག་ཆེ་གཟེར། །རྐང་པར་ལྷུང་ན་དཔྱི་སྦྲིད་སྐམ་ཁོལ་བྱེད། །རྐེད་པ་ཚ་ལ་ཆུ་རྒྱུས་ན་བར་འོང༌། །
ཁ་ལུད་གློ་དང་ཕོ་བར་ལུད་པ་གཉིས། ། གློར་ལུད་སྟོད་རྫིངས་མིག་དམར་མཆན་མཆིན་འོག་གཟེར། །ཁྲག་ཏུ་ལུ་ཞིང་སྐབས་སུ་རྣག་ཁྲག་འཛག །ཕོ་བར་ལུད་ན་བསྡམས་ཤིང་གཟེར་ནས་ན། །དགྱེ་དགུ་མི་ཤེས་ཚ་ཙེག་སྒྲེག་པ་འོང༌། །ལྡང་དུབ་ཆེ་ལ་གསུས་པ་ལྟར་མི་མངོན། །
གཞུང་རེངས་རྐང་ལག་རེངས་ལ་ལྷུ་ཚིགས་ན། །དགྱེ་དགུ་མི་ཤེས་སྟོད་གཟེར་ལྟག་པར་དགྱེ། །
མཆིན་གྲུམ་ནག་པོ་ལུས་ཀུན་བརྡུངས་སྙམ་བྱེད། །རྐང་བཤལ་འགུལ་ན་མི་བཟོད་སྒུར་པོར་འགྲོ། །
ཧལ་སྐེམས་ལུས་པོ་ཟ་འདར་གཞོགས་གཡས་ལྕི། །མིག་མདངས ཆུང་ཞིང་འཛུར་ལ་སྐོམ་དད་ཆེ། །
མཆིན་དྲི་དཀར་པོ་ལྷེན་སྣ་གཡས་གཡོན་ན། །གཉིད་ཆེ་ཁ་སྐམ་རྩིབ་ལོགས་གཟེར་ནས་ན། ། མཆིན་དྲི་ནག་པོ་སྲོག་རྩ་སྙིང་མི་བདེ། །ཁོང་པ་སྟོང་སྦོས་ལྷེན་སྣར་འདྲིལ་ནས་ན། ། གནད་མཆིན་རྩ་བྱེར་སྟོད་གཟེར་ཐལ་གོང་ན། །སྟོད་གང་ཕོ་མཆིན་མི་བདེ་རྩེ་ཆུང་རེངས། །གློ་བྱུང་མཆིན་པ་འཕྱོངས་ལ་བཟོད་ཐབས་མེད། །བྱད་སྨུག་སྣ་ཁྲག་འཛག་ཅིང་ཅི་ཟོས་གནོད། །
མཆིན་རླུང་གཡལ་བྱུང་རྗེས་ལ་མཆི་མ་འཛག །ཕོ་མཆིན་འདྲེས་སྙམ་བྱེད་ཅིང་ན་ལ་འཕྱོངས། །དགོང་དང་ཐོ་རངས་ན་ཞིང་གྲང་ན་སྐྱིག །
མཆིན་རྒུད་ཟས་ཟོས་རྗེས་ལ་མཆིན་པ་ན། །ཉམ་ཆུང་ཆུ་དྲོན་སྐྱུག་ལ་གཡལ་མི་ཕྱིན། ། མཆིན་པ་རླན་གྲང་པུས་མོ་གྲང་ཞིང་ཟ། །སྟོད་གང་གློ་སྐམ་ལུ་ཞིང་དགྱེ་དགུ་དཀའ། ། གླང་དགུར་ལུས་སྐྲངས་བྱད་སྦོས་ལྕེ་མཆུ་སྐྱ། །མགོ་འཁོར་སྐྲ་སྨིན་ཟ་ལ་སྣ་ཤུ་འབྱུང༌། ། གྲང་སྦོས་ཁོང་པ་གྲང་ལ་བྱད་ཤ་སྦོས།།
བཅོས་ཐབས་བཤད་པ།
བཅོས་ཐབས་མཆིན་ནད་ལེབ་རྒན་རྒྱས་པ་ལ། ། གི་ཝཾ་སྐྱུ་རུ་ར་ཡི་ཐང་བཏང་ལ། ། ར་ས་ཡ་ནའི་བཤལ་བཏང་རུ་ཐུང་གཏར། ། མཁྲིས་ཆེན་སྦྱོར་བ་རྒུན་འབྲུམ་ཐང་གིས་དབུལ། ། ཚ་བ་ཞེན་ཆེ་ག་བུར་བདུན་པ་སྦྱར། ། ཉལ་བའི་སྔས་སྨད་ཁ་ཟས་བསིལ་དུ་བསྟེན། །
མཆིན་ནད་ལྡེམ་བུ་ཨ་རའི་ཐང་ཁྲུས་བྱ། ། གཡུ་རྙིང་ཅུར་ནིས་བྲག་ཞུན་ལྔ་པ་སྦྱར། །
དུག་ཐབས་སྨྱུང་བྱས་གསེར་ཕུད་སྐྱུགས་ཀྱིས་དྲང༌། ། གཡུ་རྙིང་བདུན་པ་སྙི་བའི་ཐང་གིས་དབུལ། ། རྗེས་གཅོད་གི་ཝཾ་བརྒྱད་པ་བ་འོས་དེད། །
མཆིན་པ་ཆུ་ཤོར་ར་གསུམ་བ་ལེའི་ཐང༌། ། རུ་ཐུང་རྩེ་ཆུང་མཆིན་མཁྲིས་འདོམ་རྩ་གཏར། ། གློ་དང་བསྡོངས་ན་ཅུ་གང་ལྡེ་གུ་སྦྱར། ། རྗེས་ལ་ཚིགས་པ་ལྔ་དང་དགུ་པ་བསྲེག ། མཆིན་ནད་རྐུན་བུ་ཨ་སོ་གཉིས་ལ་གཏར། །བ་ལེ་ཀ་ཡི་བཤལ་བཏང་རུ་ཐུང་
གཏར། །
མཆིན་པ་འོར་དུ་ལྷུང་བ་གཉིས་ཀ་ལ། ། འབྲས་བུ་གསུམ་གྱི་ཐང་བཏང་བྱིན་ལོང་གཏར། ། དམར་གསུམ་ཕྱེ་མར་དར་ཡ་ཀན་ཐང་བཏང་། །མཆིན་ཁྲག་གློ་ལ་ལུད་ན་ཐང་ཁྲུས་བྱ། ། གློ་རྩ་རུ་ཐུང་གཏར་ཞིང་བསིལ་སྨན་བཏང༌། །ཕོ་བར་ལུད་ན་རུ་ཐུང་འདོམ་རྩ་གཏར། །ར་གསུམ་བཤལ་དང་བ་ལེ་ཀ་ཐང་བཏང༌། །
མཆིན་པ་གཞུང་རེངས་དུར་ལྕགས་ཐང་དུ་བཏང༌། ། རུ་ཐུང་དྲུག་འགོ་ཕོ་གདུང་གཏར་བར་བྱ། ། བྱ་བྲུན་སྦང་སྐམ་དུགས་ཀྱིས་གཞུང་བཤུལ་བདུག ། བ་ལེ་ཀ་ཐང་བྲག་ཞུན་ཅུར་ནིས་བཏང༌། །
མཆིན་གྲུམ་ནག་པོ་འབྲས་བུ་གསུམ་ཐང་བཏང༌། ། རྔུལ་དབྱུང་རྩེ་ཆུང་གཏར་ཞིང་སྔོན་བུས་སྦྱང༌། །མར་གསར་སོ་མ་ར་ཛ་འི་ལྡེ་གུ་བཏང༌། ། རྗེས་ལ་ཤ་སྲུབས་ཚིགས་དམིགས་གར་བབས་བསྲེག །
མཆིན་ནད་ཧལ་སྐེམ་ཨ་བི་ཥ་ཡི་ཐང༌། ། སྔོན་བུའི་བཤལ་བཏང་རུ་ཐུང་ཕྲན་བུ་་གཏར། ། ལུམས་རྗེས་སྨན་མར་སྦྱར་ལ་དགུ་པ་བསྲེག །
མཆིན་དྲི་དཀར་པོ་མཆིན་མཁྲིས་འདོམ་རྩ་གཏར། ། བ་ལེ་ཀ་དང་ཀྱི་ལྕེའི་གྲང་ཐང་བཏང༌། ། གུར་ཀུམ་བརྒྱད་པའི་ལྡེ་གུ་སྦྱར་བར་བྱ། །
མཆིན་དྲི་ནག་པོ་བྲག་ཞུན་ཐང་བཏང་ལ། ། རུ་ཐུང་གཏར་ཞིང་རྗེས་ལ་བརྒྱད་པ་བསྲེག ། གནད་མཆིན་རྩ་བྱེར་རུ་ཐུང་རྩེ་ཆུང་གཏར། ། འདོམ་རྩ་ཨ་སོ་བྱིན་གཞུག་ལོང་རྩ་གཏར། །བ་ལེའི་ཐང་བཏང་འབྲས་བུ་གསུམ་གྱིས་སྦྱང༌། ། དེ་ལྟར་མཆིན་ནད་ཚ་བ་དེ་རྣམས་ལ། །ཁ་ཟས་བསིལ་བསྟེན་རུལ་སྐྱུར་དྲོད་བག་སྤང༌། །ཚ་བ་ཆོམས་ན་གསར་བཅུད་དྲོད་ལ་དབབ། །རྗེས་ལ་ཚིགས་པ་བརྒྱད་དགུ་གར་བབས་བསྲེག །
མཆིན་རླུང་ཐོང་ཚེར་མཆིན་པ་སྤོད་བྲན་བཏང༌། ། བུར་དཀར་མར་གསར་ཏིང་ཁྲོལ་སྤོད་ལྡན་མུར། ། ར་གསུམ་མར་སྦྱར་དགུ་པ་ཁ་གསུམ་བསྲེག །
མཆིན་རྒུད་དེ་འདྲ་སེ་འབྲུ་ད་ལིས་བཏང༌། ། ཨ་རུ་འབྲི་རྐང་གཟེ་མའི་སྨན་མར་སྦྱར། ། མཆིན་ནད་རླན་གྲང་དེ་བཞིན་མཆིན་གསང་བསྲེག །
མཆིན་པ་གླང་དགུར་འབྲས་བུའི་རྒྱུན་བཤལ་བཏང་། ། སེ་འབྲུ་ལྔ་པ་སྐེམས་སྨན་སྦྱར་ལ་བསྟེན།
། ཁ་ཟས་ཁྲེའུ་རྗེས་ལ་མེ་ཡིས་བཅད། །
མཆིན་པ་གྲང་སྦོས་ད་ལིས་སེ་འབྲུ་སྦྱར། །ལྔ་དང་དྲུག་པ་ལྷེན་སྣ་ཁ་གསུམ་བསྲེག ། དེ་ལྟར་མཆིན་ནད་གྲང་བ་དྲོད་ཀྱིས་བཅོས། ། གསར་འཇམ་ལུག་ཤ་ལ་སོགས་དྲོད་ལ་བསྒོར། །ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཆིན་ནད་གསོ་བའི་ལེའུ་སྟེ་སོ་དྲུག་པའོ།། །།
No comments:
Post a Comment