ལེའུ་རེ་གསུམ་པ། འབྲས་བཅོས་པ།
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །ལྷན་སྐྱེས་རྨ་གསོའི་སྐབས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང་། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག
ལྷན་སྐྱེས་རྨ་ལ་འབྲས་དང་གཞང་འབྲུམ་དང༌། །མེ་དབལ་སུར་ཡ་རྨེན་བུ་རླིག་རླུགས་དང་། །རྐང་བམ་མཚན་བར་རྡོལ་དང་བརྒྱད་དུ་བཤད། ། དང་པོ་འབྲས་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན། ། དང་པོ་རྒྱུ་སྐྱེན་གཞི་མཐུན་དུ་བསྟན་པ། རྒྱུ་ནི་འགྲམ་འཁྲུགས་ཁ་ཟས་མ་སྨིན་པས། །ངན་ཁྲག་རྒྱས་ཏེ་རླུང་གིས་བསྒྲིལ་ནས་འབྱུང༌།
།གཉིས་པ་དབྱེ་བ་སྟན་པ། དབྱེ་བ་གནས་དང་ཉེས་པའི་རིགས་ཀྱིས་དབྱེ།
། ༡ གནས་ཀྱི་དབྱེ་བ་སྟན་པ། གནས་ཀྱིས་དབྱེ་ན་ཕྱི་འབྲས་ནང་འབྲས་གཉིས། ། ཕྱི་ལ་ཤ་རུས་རྩ་ཡི་འབྲས་དང་གསུམ།
།ནང་འབྲས་གློ་སྙིང་མཆིན་མཆེར་མཁལ་མ་དང༌། །ཕོ་བ་རྒྱུ་ལོང་གཞང་དང་ལྒང་པ་དགུ། ། ༢ ཉེས་པའི་རིགས་ཀྱིས་དབྱེ་བསྟན་པ། དེ་རིགས་རླུང་མཁྲིས་ཁྲག་དང་བད་ཀན་དང༌།
།མཚོན་དང་བྱེ་འབྲས་དབྱེ་བ་བཅོ་བརྒྱད་བཤད། །
གསུམ་པ་རྟགས་བསྟན་པ།/ དེ་རྟགས་ཕྱི་ནང་རིགས་ཀྱིས་བརྟག་པ་གསུམ།
།༡ ཕྱི་འབྲས་ཀྱི་བརྟག་པ་བསྟན་པ་ལ་སྤྱི་དང་ཁྱད་པར་གཉིས། (༡) ཕྱི་འབྲས་ཀྱི་རྟགས། ཕྱི་འབྲས་སྤྱི་རྟགས་རྩ་རྒྱུད་ཕྲ་ལ་འདར།
།སྐྲངས་པ་སྲ་བརྟན་ན་ཟུག་ཆུང་བ་ལ། །ལུམས་འདུལ་ཀུན་གྱིས་ཞི་བར་མི་འགྱུར་བའོ། །
(༢) ཁྱད་པར་གྱི་་རྟགས་ལ་ཤ་འབྲས། རུས་འབྲས།
རྩ་འབྲས་བཅས་གསུམ། ཀ་༡ ཤ་འབྲས་ཀྱི་རྟགས། ཁྱད་པར་ཤ་འབྲས་ཉུང་གཤེར་འཁྱགས་པ་འདྲ། ། ཀ་ ༢ རུས་འབྲས་ཀྱི་རྟགས། རུས་འབྲས་རུས་པ་མདོག་འགྱུར་རྩི་ཉམས་ཟོས། །རྣག་ཆུ་སྲོ་མ་ཁུ་ཚིགས་འབྱུང་བ་ཡིན།
། ཀ་༣ རྩ་འབྲས་ཀྱི་རྟགས། རྩ་འབྲས་རྩ་ཐོག་སྐྲངས་ཤིང་འཁྱུག་ལ་འཕྲོ།
།དེ་དག་གནད་སྟེང་བྱུང་བ་གསོ་བ་དཀའ། ། ༢ ནང་འབྲས་ཀྱི་རྟགས་ལ་ཡང་སྤྱི་དང་བྱེ་བྲག་གཉིས་སོ།
(༡) སྤྱི་རྟགས་བསྟན་པ། ཁོང་འབྲས་སྐྲན་ལྟར་རེག་པ་སྲ་བའམ།
།མི་མངོན་གཏིང་ནུབ་ཟས་ལ་འཁྲེན་པ་སྟེ། །སྨིན་ནས་གྱེན་ཐུར་གཉིས་ཀར་རྣག་རྡོལ་འགྱུར། །
(༢) ཁྱད་པར་གྱི་རྟགས་བསྟན་པ། གློ་འབྲས་མིད་པ་ན་ཞིང་ཟས་མིད་དཀའ།
།སྙིང་འབྲས་དྲན་པ་མི་གསལ་མུན་སྲོས་སེམས། །མཆིན་འབྲས་དབུགས་འགག་མགོ་འཁོར་སྐོམ་དད་ཆེ།
།མཆེར་འབྲས་སྦོ་འཁྲོག་བྱེད་ཅིང་དབུགས་མི་བདེ། །མཁལ་འབྲས་ཆུ་སྲི་བཙིར་སྙམ་རྐེད་པ་ན།
།ཕོ་བ་ལྟོ་སྦོ་ཟས་འཁྲེན་མིད་པ་ན། །རྒྱུ་ལོང་ཞུ་རྗེས་ན་ལ་སྐྱིགས་བུ་འོང༌། །གདོང་པ་རྐང་བོལ་གཡོ་ཞིང་འཁྲུ་བར་འགྱུར།
།གཞང་འབྲས་གཞང་ཁ་ན་ཞིང་ཕྱེན་དབུགས་འགག །ལྒང་པ་ཆུ་འགགས་ཟུག་ཆེ་ཆུ་སོ་ན། ། དོན་བསྡུ་བ། ཕལ་ཆེར་ཕོ་ལོང་མིད་པའི་འབྲེལ་མཚམས་མང༌།
།དེ་ཕྱིར་ཕོ་བའི་ཁ་འཛིན་གཅེས་པ་ཡིན། ། ༣ རིགས་ཀྱི་རྟགས་བསྟན་པ། རིགས་ཀྱི་སྒོ་ནས་དབྱེ་བའི་རྟགས། རླུང་གྱུར་སྦོ་འཁྲོག་མི་བརྟན་མགོ་བོ་འཁོར།
།མཁྲིས་གྱུར་དམར་ཚ་མྱུར་རྣག་ཚ་བ་སྐྱེ། །བད་ཀན་མདོག་སྐྱ་སྒྲེག་ཅིང་ཟས་མི་འཇུ། །ཁྲག་ལས་གྱུར་པ་ནུ་མ་མངལ་དུ་འབྱུང༌།
།རབ་ཏུ་ཚ་ལ་འབྲུམ་པ་ནག་པོས་ཁྱབ། །མཚོན་ལམ་ལ་བརྟེན་རྡོ་ལ་ཐུག་ལ་སོགས། །ཞི་ཞིང་སླར་ལྡང་རྒྱུན་དུ་གནས་པར་བྱེད།
།བྱེ་འབྲས་བྱེ་སྒོང་ཙམ་སྲ་ཟུག་མེད་བརྟན། །
བཞི་པ་འབྲས་བཅོས་པའི་ཐབས་བསྟན་པ། བཅོས་པའི་ཐབས་ཀྱང་དེ་བཞིན་རྣམ་གསུམ་སྟེ།
། ༡ ཕྱི་འབྲས་ཀྱི་བཅོས་ཐབས་བསྟན་པ། ཕྱི་འབྲས་དང་པོ་གདུལ་དང་བར་སྐྱོན་བསལ།
།ཤ་འུ་གསོ་ཞིང་ཐ་མ་རྨེན་བརྟས་བྱ། །
(༡) དང་པོ་འབྲས་འདུལ་བའི་བཅོས་ཐབས། འབྲས་འདུལ་ཤ་ལ་མི་རུས་ཉ་ཡི་ཤ
།སྤྲུ་རྩ་རེ་ལྕག་ཅོང་ཞི་དྲི་ཆུའི་ལུམས། །རུས་ལ་པི་པི་ལིང་དང་ར་མཉེ་བསྣན། །རྩ་ལ་མཚལ་དང་ཚ་ལས་བྲན་ལ་བདུག
། ཡང་ན་ཤ་ལ་བདུད་རྩི་ལྔ་ཡིས་བདུག །རུས་ལ་འབའ་ཆའམ་རུས་སྣ་སྣ་ཚོགས་ལུམས༌། རྩ་ལ་བསིལ་བའི་སྔོ་སྣས་གདུལ་བར་བྱ།
།ཁ་ཟས་ཕྱོགས་མེད་འཇིག་ཟས་བཏང་ལ་བཤིག ། ཐུལ་རྟགས་སྐྲངས་ཤིང་ཧྲེམ་མེད་མཉེན་ལ་བདེ།
།དེ་ཡི་སྟེང་དུ་མེ་བཙའ་འཚོས་པར་བསྲེག ། ཡང་ན་སྐྲངས་འདུས་ཚ་འཁྱུག་རྣག་སྨིན་འགྱུར། །རྣག་ཕུག་འཇིབས་ཁྲུས་རུལ་བཅད་འབྱར་གྱིས་བཅོས།
།
(༢) བར་དུ་སྐྱོན་བསལ་བའི་བཅོས་ཐབས། སྐྱེད་མེད་བར་དུ་ཤ་རོ་སྐྱོན་བསལ་བ། །དངུལ་ཐལ་རྒྱ་ཚྭ་རུ་རྟ་བྱང་པ་བཞི།
།ཡང་ན་བསེ་ཞོ་བཙན་དུག་དངུལ་ཐལ་དང༌། །སྨུག་པོ་སྦལ་རྒྱབ་དོམ་མཁྲིས་སྦྱར་བའམ། །བྱང་པ་རྒྱ་ཚྭ་རུ་རྟ་ཤུ་དག་དང༌།
།ཐར་ནུ་འབྲུག་རུས་སྦྲང་སྨྱོན་ཚ་བ་གསུམ། །རྨ་མེད་ཐུར་མས་སྨན་ལམ་གཏོད་ལ་གཞུག །རྨ་ཅན་རེངས་བུའམ་ཤོག་བུ་ལ་བྱུགས་དགབ།
།དམ་གྱིས་སྦྱར་ལ་ཞག་གསུམ་ཟ་རུ་གཞུག །སེར་ག་བྱུང་ནས་གསོན་གཤིན་མཚམས་སུ་བརྫངས། །འབམ་པོ་ཕུག་རོན་བྲུན་དང་སྦང་འཇིབས་བྱ།
།
ཡང་ན་སོ་ཐོག་ཟེ་ཚྭ་སྦྲང་སྦྱར་བཅད།
།ཆོད་པ་དཀའ་ན་ལྕགས་ཀྱིས་ནོན་པར་བསྲེག ། རུས་ལ་སྟག་ཤ་ལྕེ་ཚ་ཁབ་ལེན་གསུམ། །སྦྲང་སྨྱོན་སྦྱར་བྱུགས་ཆོད་དཀའ་བྲུད་དམ་བསྲེག
།གསོན་གཤིན་སྤྲད་ཅིང་བྱེར་ན་མགོ་ལྟར་བཅོས། །རྩ་ལ་འབྲས་བུའི་ཐང་རྗེས་མང་དུ་གཏར།
།རྩ་འབྲུམ་ཚན་དོ་འཕར་རྩ་མེ་ཡིས་མནན། །རྩ་ནས་སྦྱང་ཞིང་ཁོང་ནས་རྩ་ཁ་བསྡམ། །འཕྲོ་ཆད་ཤ་རོ་གོང་བཞིན་བསལ་བར་བྱ།
།རྩ་ཁ་ཤོར་ན་དོམ་མཁྲིས་ཐལ་བ་གཉིས། །སྤྲུ་འབྲུ་བུ་རམ་རིལ་བུས་རྩ་ཁ་བགག །སྤྲུ་རྩ་ཞོ་དང་སྦྱར་བས་རྨ་ཁ་གཡོག
།སྐྱོན་སེལ་དག་ནས་བཀྲུས་ལ་འཚོ་སྨན་གདབ། །སྐམས་ན་ཞོས་སྦང་རློན་ན་ཕྲུམ་སར་བཏང༌། །སྦོས་ན་ཕྱིང་མར་བརྩེ་ན་ལྷིང་རྩ་བྱ།
།
(༣) ཐ་མ་ཤའུ་གསོ་ཞིང་རྨེན་བརྟས་བྱས་ཐབས། ཐ་མ་རྨེན་ཆགས་བརྟས་པར་བྱ་བ་ནི། །དུར་བླུག་ཀླད་པ་ཚ་དང་སྦང་གར་བྱུག
།ཁྲུ་གང་འོག་ས་ཁུར་རྩ་རུས་སྣ་རྣམས། །དྲི་ཆུར་བཙོས་བདུགས་རྨེན་མི་ལྡང་བར་བྱེད། །
༢ ནང་འབྲས་ཀྱི་བཅོས་ཐབས་བསྟན་པ། ཁོང་འབྲས་སྨིན་ནས་གསོ་བ་དཀའ་བའི་ཕྱིར།
། སྨིན་དུ་མི་གཞུག་གསར་དུས་གསོ་བ་སྒྲིམས། ། (༡) སྤྱི་ཡི་བཅོས་ཐབས། དང་པོ་སྨྱུང་བྱས་བོང་ང་བྱི་ཏང་ག
།དུག་ཉུང་སྒྲོན་ཤིང་ཕོ་བ་རིས་བསྐོལ་བླུད། །སྟོབས་ཆེ་སྤོས་དཀར་དུར་བྱིད་ཨ་རུ་ར། །ཧོང་ལེན་དྲོད་སྨན་བ་ཆུ་སྦྱར་བས་བཀྲུ།
།
ཡང་ན་ནིམ་པ་ཧོང་ལེན་འབྲས་བུ་གསུམ། །ཤིང་མངར་པ་ཏོལ་དུར་བྱིད་ཀྱི་ལྕེ་བ།
།སྲན་ཆུང་ཁུ་བ་མར་བསྐོལ་སྦྱང་བར་བྱ། །སྐབས་སུ་འཇམ་རྩི་ནི་རུ་ཧ་སྤེལ་བཏང༌། །ཀྱི་ལྕེ་བསྡུས་ཁུར་ཏིག་ཏ་བྱི་ཚེར་བ།
།ཙན་དན་གླ་སྒང་ཨུཏྤལ་སྐྱུ་རུ་ར། །ལྕ་བ་ར་མཉེ་འོ་མ་མར་བསྐོལ་བླུད།།བྲག་ཞུན་གུ་གུལ་བ་གཅིན་མིག་ལ་བྱུག།
སྟོན་གའི་འབམ་པོ་སོས་ཀའི་དབྱི་མོང་གཉིས། །ཁཎྜར་བྱས་ཏེ་སྣ་མ་ཚིག་པ་ལ།
།བུ་རམ་བཏབ་བསྲེས་རྒྱ་ཚྭ་ཁ་རུ་ཚྭ། །ཚ་བ་གསུམ་སྦྱར་རིལ་བུ་ཁྱེའུ་སུས་བསྟེན། །འཇམ་རྩིར་བཏང་ཞིང་ཕྱི་ནས་དམིགས་ལ་བྱུགས།
།དྲོད་ལ་བསྒོར་ཞིང་ཡང་ན་འཇུ་སླ་བསྟེན། །
ཞིག་རྟགས་མཐོང་ནས་གང་ཉེའི་རྩ་ནས་དྲངས།
།འཁྲུ་ན་སྨན་ཐུན་བསྐྱེད་པས་ཁོང་འབྲས་འཇོམས། །དེས་མ་སེལ་ན་ཨ་རུ་བ་ཆུར་བསྡུས། །གོང་བཞིན་ཁཎྜས་ཚ་གྲང་གང་ཡང་འཇོམས།
།ཐ་མར་སེ་འབྲུའི་སྦྱོར་བས་ནད་རྗེས་བཅད། །
(༢) ཁྱད་པར་གྱི་བཅོས་ཐབས། ཁྱད་པར་བྲག་ཞུན་ཨ་རུ་སྤོས་དཀར་གསུམ།
།གཞིར་བཞག་གློ་ལ་ཅུ་གང་ཤིང་མངར་བསྣན། །ཙན་དན་ཛཱ་ཏི་སྐྱུ་རུ་ཞོ་ཤ་སྙིང༌། །མཆིན་པར་བ་ཤ་ཀ་དང་གུར་ཀུམ་བསྣན། །མཆེར་པར་པི་པི་ལིང་དང་ལི་ཤི་བསྣན། །མཁལ་མར་བཙོད་དང་སུག་སྨེལ་སྡིག་སྲིན་བསྣན། །ཕོ་བར་ཁ་རུ་ཚྭ་དང་བཅའ་སྒ་བསྣན། །རྒྱུ་ལོང་རྒྱམ་ཚྭ་གསེར་གྱི་མེ་ཏོག་བསྣན། །ལྒང་པར་སྡིག་སྲིན་གཞང་ལ་ནི་རུས་བསུ། །དོན་སྣོད་གར་བབས་རང་རང་རྩ་ལ་གཏར། །སྨིན་ནས་རང་དོན་ནད་དེ་བཏང་སྙོམས་བཞག །ནང་ནས་སྨིན་ཚེ་ཕྱིར་འབྱུང་རྨ་ལྟར་གསོ། །
(༣) རིགས་ཀྱི་བཅོས་ཐབས། རླུང་འབྲས་ཁྲུས་བཏང་རྩ་བ་ལྔ་བསྐོལ་བླུད། །ཁྲག་མཁྲིས་པུ་ཤེལ་རྩེ་བཙོད་འབྲས་བུ་གསུམ། །ཤེལ་ཏ་ཤིང་མངར་ཡུང་སྐྱེར་སྤ་ཤུག་འབྲུ། །སྨན་མར་བཟའ་བྱུག་གང་ཉེའི་རྩ་ལ་གཏར། །བད་ཀན་སྦྱངས་རྗེས་དུར་བྱིད་ཡུང་བ་ནས། །སྐྱེར་པ་ཏིལ་བྱུག་བྱེ་འབྲས་མེ་ཡིས་བསྲེག །མཚོན་འབྲས་མང་གཏར་ལུམས་དང་རུལ་གཅོད་སྦྱར། །ཆུ་ལུམས་མེ་བཙའ་ཤིན་ཏུ་བསྔགས་པར་འདོད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྲས་བཅོས་པའི་ལེའུ་སྟེ་དྲུག་ཅུ་རྩ་གསུམ་པའོ།། །།
No comments:
Post a Comment