ལེའུ་དོན་བརྒྱད་པ། སྨྱོ་བྱེད་ཀྱི་གདོན་གསོ་བ།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །
རྣམ་ཤེས་སྨྱོ་བྱེད་ནད་ལ་རྒྱུ་རྐྱེན་དང༌། །
དབྱེ་བ་རྟགས་དང་བཅོས་ཐབས་བཞི་ཡིས་བསྟན། །
རྒྱུ་རྐྱེན་སྙིང་སྟོབས་ཞན་ལ་མྱ་ངན་དང༌། །ཡིད་མི་བདེ་དང་སེམས་ལས་ཆེས་པ་དང༌། །ཟས་སྤྱོད་མི་འཕྲོད་གདོན་གྱིས་རྐྱེན་བྱས་ཏེ། །ཉེས་པ་འཁྲུགས་པས་རྣམ་ཤེས་རྒྱུ་གནས་ཞུགས། །ཡིད་ཀྱི་ལམ་ལོག་དྲན་ཉམས་སྨྱོ་བར་འགྱུར། །དབྱེ་བ་རླུང་མཁྲིས་བད་ཀན་འདུས་པ་དང༌། །ཡིད་གདུང་དུག་གདོན་ལས་གྱུར་བདུན་དུ་བཤད། །
དེ་རྟགས་རླུང་གྱུར་ཤ་སྐམས་ལྦུ་བར་སྐྱུག །མང་དུ་སྨྲ་ཞིང་ངུ་འབྲོས་བྱེད་པ་དང༌། །མིག་སྤྲིན་དམར་ལ་ཁ་ཟས་ཞུ་ནས་ལྡང༌། །མཁྲིས་གྱུར་ཁྲོ་བརྡེག་བསིལ་འདོད་མིག་ཆུ་སེར། །མེ་དང་སྐར་མ་མིག་སྔར་མཐོང་བར་བྱེད། །བད་ཀན་རློན་ཞིང་སྨྲ་ཉུང་ཡི་ག་འཆུ། །གཉིད་ཆེ་སྣབས་དང་ཁ་ཆུ་མང་དུ་འཛག །འདུས་པ་ལས་ནི་ཀུན་རྟགས་སྟོན་པར་བྱེད། །ཡིད་གདུང་དྲན་སྐྱེན་དུས་ལྡང་སེམས་མི་བདེ། །དུག་གིས་མདངས་ཉམས་སྟོབས་ཆུང་སེམས་འཁྲུལ་བྱེད། །གདོན་གྱུར་གང་གནོད་སྤྱོད་པར་འགྱུར་བའོ། །
བཅོས་པའི་ཐབས་ལ་སྤྱི་དང་བྱེ་བྲག་གཉིས། །
དང་པོ་ཡིད་འཇུག་བུ་གའི་ལམ་བསལ་ཕྱིར། །བསྐུ་མཉེ་ལུམས་བྱ་སྐྱུགས་ཁྲུས་གཏར་བས་སྦྱང་། །འབྲས་བུ་གསུམ་དང་ཧ་རེ་ཎུ་ཀ་དང༌། །སྒྲོན་ཤིང་ཐལ་ཏྲེས་ཡུང་སྐྱེར་པརྞི་གཉིས། །རྒྱ་སྤོས་རུ་རྟ་སྟག་ཚེར་པྲི་ཡངྐུ། །ནཱ་ག་གེ་སར་ད་ལིས་དོང་ག་བཙོད། །སེ་འབྲུ་བྱི་ཏང་ག་དང་ཀ་ཀོ་ལ། །དབྱི་མོང་ཨུཏྤལ་ཙན་དན་ཤུག་པ་རྣམས། །མར་རྙིང་དགེ་བའི་སྨན་མར་ཞེས་བྱ་སྟེ། །རོ་ཙ་བུ་བསྐྱེད་ལུས་རྒྱས་སྨྱོ་བྱེད་འཇོམས། །
ཁྱད་པར་རླུང་ལས་གྱུར་ལ་འཇམ་རྩི་བྱ། །བོང་ང་ཞོ་གཅིག་ཆང་དུ་སྦངས་ལ་བཏགས། །ཨ་རུ་དྲུག་འགྱུར་ཕྱེ་མ་ཆུ་ལ་བསྡུས། །མར་བསྐོལ་བཟང་དྲུག་བུ་རམ་བཏབ་སྟེ་བསྟེན། །ཐབས་དང་མི་ལྡན་ཚེ་ཡི་བར་ཆོད་འགྱུར། །ཡང་ན་བྱ་ཁྱུང་ལྔ་པ་ཛཱ་ཏི་མཉམ། །རིལ་བུ་བྱས་ཏེ་གཅིག་གཉིས་གསུམ་བསྐྱེད་བསྟེན། །ཛཱ་ཏིའི་མར་དང་རུས་ཆེན་སྨན་མར་དང༌། །ལོ་ཤ་ལོ་མར་ཤ་ཆེན་གར་ཆང་བསྟེན། །ཨ་རུ་ཚ་བ་གསུམ་དང་ཙི་ཏྲ་ཀ །འུ་སུ་ལ་ལ་ཕུད་དང་ཁ་རུ་ཚྭ། །རྒྱམ་ཚྭ་བུ་རམ་སྦྱར་བའི་ཕྱེ་མ་བསྟེན། །རླུང་གསང་རྣམས་སུ་མེ་དང་ཐུར་མ་བྱ། །
མཁྲིས་གྱུར་དནྡ་དུར་བྱིད་གསེར་མེ་ཏོག །ཨ་རུ་ར་དང་པི་པི་ལིང་གིས་སྦྱང༌། །ཏིག་ཏ་མ་ནུ་རུ་རྟ་བ་ཤ་ཀ །ཧོང་ལེན་གུར་ཀུམ་སྐྱུ་རུའི་ཕྱེ་མ་བཏང༌། །སྙིང་རྩ་གཏར་ཞིང་ཏིག་ཏའི་སྨན་མར་སྦྱར། །ཟས་སུ་ལུག་ཤ་རྔ་བྲན་ཤ་གསར་བསྟེན། །
བད་གྱུར་སྤྱང་ཚེར་སྒེ་གཤེར་པོ་སོ་ཆ། །བ་ཡི་འོ་མར་སྦྱར་ལ་སྐྱུག་ཏུ་གཞུག །རྩུབ་པའི་ཟས་སྨན་མེ་ཐུར་བསྟེན་པ་དང་། །
འདུས་པ་ལ་ནི་ཀུན་གྱི་གསོ་སྦྱར་བྱ། །ཡིད་གདུངས་ཆོས་ནོར་གཏམ་སྙན་གྲོགས་ཀྱིས་གསོ། །དུག་ལ་དཔའ་སེར་བོང་ང་དཀར་དམར་རྩད། །རེ་རལ་ཡུང་བ་དྲི་ཆུའི་རིལ་བུ་བསྟེན། །གདོན་གྱུར་བྱི་ལ་ར་ཐུག་འུག་པ་ཝ། །གཅིན་རྟུག་མཁྲིས་སེན་སྤུ་ལྤགས་སྤོས་སྦྱར་བདུག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨྱོ་བྱེད་ཀྱི་གདོན་གསོ་བའི་ལེའུ་སྟེ་བདུན་ཅུ་རྩ་བརྒྱད་པའོ།། །།
No comments:
Post a Comment